இலங்கை டெஸ்ட் அணியின் புதிய தலைவராக குசல் மெண்டிஸ் நியமனம்

இலங்கை டெஸ்ட் கிரிக்கெட் அணியின் புதிய தலைவராக குசல் மெண்டிஸ் நியமிக்கப்பட்டுள்ளார். அணித் தலைவர் பதவியிலிருந்து தனஞ்சய டி சில்வா விலகியதைத் தொடர்ந்து இந்த நியமனம் இடம்பெற்றுள்ளது. புதிய தலைவராக குசல் மெண்டிஸ் பொறுப்பேற்கும் முதல் தொடராக, நவம்பர் மாதம் பாகிஸ்தானுக்கு எதிராக நடைபெறவுள்ள இரண்டு போட்டிகளைக் கொண்ட டெஸ்ட் தொடர் அமையவுள்ளது.

தனஞ்சய டி சில்வா வியாழக்கிழமை காலை தனது பதவியிலிருந்து விலகுவதாக அறிவித்தார். அடுத்த தலைமுறையினருக்கு தலைமைத்துவப் பொறுப்பை ஒப்படைக்க விரும்புவதாக அவர் தனது முடிவுக்கான காரணத்தைத் தெரிவித்தார். எனினும், வீரராகத் தொடர்ந்து இலங்கை அணிக்காக விளையாடத் தயாராக இருப்பதாகவும் அவர் குறிப்பிட்டுள்ளார்.

2024 பெப்ரவரி முதல் 2026 ஆகஸ்ட் வரை 18 டெஸ்ட் போட்டிகளில் இலங்கை அணிக்குத் தலைமை தாங்கிய தனஞ்சயவின் தலைமையில், இலங்கை அணி ஏழு வெற்றிகளையும் எட்டு தோல்விகளையும் சந்தித்ததுடன், மூன்று போட்டிகளை வெற்றி தோல்வியின்றி நிறைவு செய்தது.

குசல் மெண்டிஸ் இதற்கு முன்னர் இலங்கை டெஸ்ட் அணிக்குத் தலைமை தாங்கியதில்லை. இருப்பினும், அவர் இலங்கையின் அனுபவமிக்க சர்வதேச வீரர்களில் ஒருவராவார். பல ஆண்டுகளாக ஒருநாள் அணிக்குத் தலைமை தாங்கியுள்ள அவர், இந்த ஆண்டு மே மாதத்தில் மட்டுப்படுத்தப்பட்ட ஓவர்கள் கொண்ட போட்டிகளுக்கான நிரந்தர அணித் தலைவராக நியமிக்கப்பட்டார்.

2023 ஒக்டோபரில் முதல் முறையாக ஒருநாள் போட்டிகளில் இலங்கை அணிக்குத் தலைமை தாங்கிய குசல், இதுவரை 22 போட்டிகளில் அந்தப் பொறுப்பை வகித்துள்ளார். அவற்றில் இலங்கை அணி 10 வெற்றிகளையும் 10 தோல்விகளையும் பதிவு செய்துள்ளது.

இந்த ஆண்டு ஜூன் மாதம் மேற்கிந்தியத் தீவுகளுக்கான சுற்றுப்பயணத்தின்போது, முதல் முறையாக இருபதுக்கு 20 சர்வதேசப் போட்டிகளில் இலங்கை அணிக்குத் தலைமை தாங்கினார். அந்தத் தொடரில் இலங்கை அணி 2-1 எனத் தோல்வியடைந்தது.

டெஸ்ட் கிரிக்கெட்டில் 75 போட்டிகளில் விளையாடியுள்ள குசல் மெண்டிஸ், மொத்தமாக 4,836 ஓட்டங்களைக் குவித்துள்ளார். இதன் மூலம் இலங்கைக்காக டெஸ்ட் போட்டிகளில் அதிக ஓட்டங்கள் எடுத்த வீரர்களில் 12ஆவது இடத்தில் உள்ளார்.

நடப்பு உலக டெஸ்ட் சம்பியன்ஷிப் சுழற்சியில் முதல் இரண்டு இடங்களுக்குள் இலங்கை அணி முன்னேறுவதற்கான வாய்ப்பு மிகவும் குறைந்துள்ள நிலையில், அடுத்த சுழற்சி ஆரம்பமாவதற்கு முன்னர் புதிய தலைவராகத் தனது பொறுப்புகளுக்குப் பழகிக்கொள்ள குசல் மெண்டிஸுக்கு வாய்ப்பு கிடைக்கும்.

தனஞ்சய டி சில்வாவின் விலகல், இலங்கை டெஸ்ட் அணிக்கு சவாலான காலகட்டத்தைத் தொடர்ந்து இடம்பெற்றுள்ளது. இந்த ஆண்டு மேற்கிந்தியத் தீவுகளுக்கு எதிரான வெளிநாட்டுத் தொடரிலும், இந்தியாவுக்கு எதிரான சொந்த மண்ணிலான தொடரிலும் இலங்கை அணி 1-0 எனத் தோல்வியடைந்தது.

தனஞ்சயவின் தலைமைத்துவக் காலத்தில் இலங்கை எதிர்கொண்ட முக்கிய சவால்களில் ஒன்று, டெஸ்ட் போட்டிகள் குறைந்த அளவில் அட்டவணைப்படுத்தப்பட்டிருந்தமையாகும். 2025 ஜூன் மாதத்தில் பங்களாதேஷுக்கு எதிரான சொந்த மண்ணிலான தொடரை 1-0 எனக் கைப்பற்றிய பின்னர், அடுத்த 12 மாதங்களுக்கு இலங்கை அணிக்கு டெஸ்ட் போட்டிகள் எதுவும் அட்டவணைப்படுத்தப்படவில்லை.

நடப்பு உலக டெஸ்ட் சம்பியன்ஷிப் சுழற்சியில் இலங்கை அணி 12 டெஸ்ட் போட்டிகளில் மட்டுமே விளையாடவுள்ளது. இது அணிகளுக்கு ஒதுக்கப்பட்டுள்ள குறைந்தபட்ச போட்டி எண்ணிக்கையாகும். குறிப்பாக டெஸ்ட் கிரிக்கெட்டில் மட்டுமே கவனம் செலுத்தும் வீரர்களுக்கு இத்தகைய குறைந்த போட்டி அட்டவணை பெரும் சவாலாக இருப்பதாக தனஞ்சய முன்னர் பலமுறை சுட்டிக்காட்டியிருந்தார்.