ශාන්තෝට උණ සහ ආසාදනයක් – ආසියානු ක්‍රීඩා උළෙලේ බංග්ලාදේශ සංචිතයෙන් ඉවතට

බංග්ලාදේශ පිතිකරු නජ්මුල් හොසේන් ශාන්තෝ උණ සහ ආසාදන තත්ත්වයක් හේතුවෙන් මෙවර ආසියානු ක්‍රීඩා උළෙලේ ක්‍රිකට් තරගාවලියෙන් ඉවත්ව තිබේ.

බංග්ලාදේශ කණ්ඩායමේ භෞතචිකිත්සක බයිජෙදුල් ඉස්ලාම් ඛාන් සඳහන් කළේ නාගෝයා වෙත පැමිණි දින සිටම ශාන්තෝ උණෙන් පෙළුණු බවයි.

“ශාන්තෝ ඩකා සිට පැමිණි ගුවන් ගමනේ සිටම උණ තිබුණා. එය අඩු මට්ටමේ උණක් වුවත් මේ දක්වා ඉහළ පහළ යමින් තිබෙනවා. උණ හේතුවෙන් ඔහු දුර්වල වී තිබෙනවා,” යනුවෙන් බයිජෙදුල් පැවසීය.

දින හතරක් පුරා උණ පැවතීම හේතුවෙන් ශාන්තෝගේ රුධිර පරීක්ෂණයක්ද සිදුකර ඇති අතර, ඔහුගේ ශරීරයේ යම් ආසාදන තත්ත්වයක් පවතින බව හඳුනාගෙන තිබේ. කෙසේ වෙතත් ඔහුට ඉන්ෆ්ලුවෙන්සා හෝ කොවිඩ්-19 ආසාදනය වී නොමැති බව තහවුරු වී ඇත.

ශාන්තෝට තරගාවලිය අවසන් වීමට පෙර සම්පූර්ණ සුවය ලැබීමට නොහැකි වනු ඇති බැවින් ඔහුව නැවත ඩකා වෙත යැවීමට බංග්ලාදේශ කණ්ඩායම් කළමනාකාරීත්වය තීරණය කර තිබේ. ඔහු අඟහරුවාදා ඩකා බලා පිටත්ව යාමට නියමිතය.

වසරකට වැඩි කාලයකට පසුව නැවත බංග්ලාදේශ T20I සංචිතයට කැඳවා තිබූ ශාන්තෝගේ අහිමි වීම එරට කණ්ඩායමට සැලකිය යුතු පාඩුවක් වනු ඇත.

බංග්ලාදේශය ආසියානු ක්‍රීඩා උළෙලේ සිව්වැනි අර්ධ අවසන් පූර්ව තරගයේදී අඟහරුවාදා මැලේසියාවට එරෙහිව තරග කිරීමට නියමිතය.

කෙසේ වෙතත් ශාන්තෝගේ සුවය ලැබීමෙන් පසු ඔක්තෝබර් 9 වැනිදා ආරම්භ වීමට නියමිත ඇෆ්ගනිස්තානයට එරෙහි එක් ටෙස්ට් තරගය සඳහා බංග්ලාදේශ කණ්ඩායම මෙහෙයවීමට ඔහු නැවත සූදානම් වනු ඇත.