ශ්‍රී ලංකාවෙන් කාන්තා චැම්පියන්ස් කුසලානය ඉවතට – ඉන්දියාවට සත්කාරකත්වය හිමිවීමේ ඉඩක්

2027 පෙබරවාරි මාසයේදී ශ්‍රී ලංකාවේ පැවැත්වීමට නියමිතව තිබූ පළමු කාන්තා චැම්පියන්ස් කුසලාන තරගාවලිය ශ්‍රී ලංකාවෙන් ඉවත් කිරීමට තීරණය කර ඇතැයි වාර්තා වේ.

කණ්ඩායම් හයක සහභාගීත්වයෙන් පැවැත්වීමට නියමිත මෙම තරගාවලිය එම කාලසීමාවේදීම වෙනත් රටක පැවැත්වීමට නියමිත අතර, ඉන්දියාවට සත්කාරකත්වය හිමිවීමේ වැඩි ඉඩක් පවතින බව සඳහන් වේ. නව සත්කාරක රට පිළිබඳ අවසන් තීරණය ඔක්තෝබර් මාසයේ පැවැත්වෙන ICC මණ්ඩල රැස්වීමේදී ගැනීමට නියමිතය.

ශ්‍රී ලංකාවට සත්කාරකත්වය අහිමි වීමට ප්‍රධාන හේතුව ලෙස ශ්‍රී ලංකා ක්‍රිකට් ආයතනයට සිදුවූ රජයේ මැදිහත්වීම දැක්වේ. මේ වනවිට SLC පරිපාලනය රජය විසින් පත් කළ Transformation Committee නමැති අතුරු පරිපාලනයක් යටතේ පවතී.

දේශපාලනිකව පත් කරන ලද අතුරු පරිපාලන ක්‍රම ICC විසින් පිළි නොගන්නා අතර, Transformation Committee පත් කිරීමෙන් පසු ශ්‍රී ලංකා ක්‍රිකට් නියෝජිතයන් ICC මණ්ඩල රැස්වීම් සඳහා සහභාගී වී නොමැත.

මෙම තීරණය ශ්‍රී ලංකා කාන්තා කණ්ඩායමටද දැඩි බලපෑමක් එල්ල කළ හැකිය. තරගාවලිය සඳහා කණ්ඩායම් හයක් පමණක් තෝරාගනු ලබන්නේ ICC ශ්‍රේණිගත කිරීම් අනුව වන අතර, මේ වනවිට ශ්‍රී ලංකාව හත්වැනි ස්ථානයේ පසුවෙයි.

දැනට ශ්‍රේණිගත කිරීම්වල පළමු ස්ථාන පහ ඕස්ට්‍රේලියාව, එංගලන්තය, ඉන්දියාව, නවසීලන්තය සහ දකුණු අප්‍රිකාව සතුව පවතින අතර, බටහිර ඉන්දීය කොදෙව් කණ්ඩායම හයවැනි ස්ථානයේ සිටී. ඒ අනුව ශ්‍රී ලංකාව තරගාවලියට සුදුසුකම් නොලැබුණහොත් බටහිර ඉන්දීය කොදෙව් කණ්ඩායමට අවස්ථාව හිමිවිය හැකිය.

මෙය වසර තුනක් ඇතුළත ශ්‍රී ලංකාවට ICC තරගාවලියක සත්කාරකත්වය අහිමි වන දෙවැනි අවස්ථාව වේ. 2023දී දේශපාලන මැදිහත්වීම් හේතුවෙන් 2024 පිරිමි වයස අවුරුදු 19න් පහළ ලෝක කුසලාන තරගාවලියේ සත්කාරකත්වයද ශ්‍රී ලංකාවෙන් ඉවත් කර දකුණු අප්‍රිකාවට ලබා දී තිබුණි.

මේ අතර Transformation Committee විසින් නව ශ්‍රී ලංකා ක්‍රිකට් ව්‍යවස්ථාවක් සකස් කර ඇති අතර, එය ඉදිරි සති කිහිපය තුළ පාර්ලිමේන්තුවට ඉදිරිපත් කිරීමට නියමිත බව සඳහන් වේ. එම ක්‍රියාවලිය සාර්ථකව සිදුවුවහොත් 2026 වසර අවසන් වීමට පෙර SLC නිලවරණය පැවැත්වීමට හැකි වනු ඇතැයි කමිටු සාමාජිකයන් විශ්වාසය පළ කර තිබේ.