සිම්බාබ්වේ පරදා බටහිර ඉන්දීය කොදෙව් කාන්තා කණ්ඩායමට කඩුලු 8ක ජයක්

ජාහ්සාරා ක්ලැක්ස්ටන්ගේ තුන් ඉරියව් දස්කම් සහ කරිෂ්මා රාම්හරැක්ගේ විශිෂ්ට පන්දු යැවීම හේතුවෙන් සිම්බාබ්වේ කාන්තා කණ්ඩායම පරාජයට පත් කරමින් පළමු විස්සයි20 තරගයෙන් කඩුලු 8ක ජයක් ලබාගැනීමට බටහිර ඉන්දීය කොදෙව් කාන්තා කණ්ඩායම සමත් විය.

හරාරේහි පැවැති තරගයේදී පළමුවෙන් පන්දුවට පහරදුන් සිම්බාබ්වේ කණ්ඩායම නියමිත පන්දුවාර 20 අවසානයේ කඩුලු 9ක් දැවී ලකුණු 97ක් රැස් කළේය.

සිම්බාබ්වේ ඉනිම සීමා කිරීමේදී කරිෂ්මා රාම්හරැක් කඩුලු 3ක් දවාගත් අතර, ජාහ්සාරා ක්ලැක්ස්ටන් සහ අෆී ෆ්ලෙචර් කඩුලු 2 බැගින් දවාගත්හ.

සිම්බාබ්වේ වෙනුවෙන් බෙලව්ඩ් බීසා ලකුණු 21ක් රැස්කරමින් ඉනිමේ වැඩිම ලකුණු ලාභියා වූ අතර, මොඩෙස්ටර් මුපාචිකා ලකුණු 20ක් ලබා ගත්තාය. ඔවුන්ගේ ඉනිම පුරා ලකුණු ලබා නොගත් පන්දු 60කට වැඩි සංඛ්‍යාවක් වාර්තා වූ අතර, හතරේ පහර 7ක් පමණක් ඇතුළත් විය.

ලකුණු 98ක පහසු ඉලක්කයක් හඹා ගිය බටහිර ඉන්දීය කොදෙව් කණ්ඩායම පන්දුවාර 15.4කදී කඩුලු 2ක් පමණක් දැවී එම ඉලක්කය පසුකර ගියේය.

රීලියානා ග්‍රිමන්ඩ් පන්දු 25කින් ලකුණු 34ක් රැස් කළ අතර, එයට හතරේ පහර 5ක් සහ හයේ පහරක් ඇතුළත් විය. ජාහ්සාරා ක්ලැක්ස්ටන් නොදැවී ලකුණු 31ක් රැස්කරමින් කණ්ඩායමේ ජයග්‍රහණය තහවුරු කළ අතර, තරගයේ වීරවරිය ලෙසද සම්මාන ලැබුවාය.

ඒ අතර අෆී ෆ්ලෙචර් පන්දු යැවීමෙන් කඩුලු 2ක් දවාගැනීමට අමතරව උඩපන්දු 4ක් රැකගත්තාය. එය විස්සයි20 ජාත්‍යන්තර තරගයක බටහිර ඉන්දීය කොදෙව් ක්‍රීඩිකාවක් රැකගත් වැඩිම උඩපන්දු සංඛ්‍යාව ලෙස වාර්තා විය.

ග්‍රිමන්ඩ් දැවී යන විට ලකුණු සම වී තිබූ අතර, ස්ටැෆනි ටේලර් තමන් මුහුණ දුන් එකම පන්දුවෙන් ජයග්‍රාහී ලකුණ ලබාගත්තාය.

මෙම ජයග්‍රහණයත් සමඟ තරග තුනකින් සමන්විත විස්සයි20 තරගාවලියේ තරග 1-0ක් ලෙස පෙරමුණ ගැනීමට බටහිර ඉන්දීය කොදෙව් කණ්ඩායම සමත් විය.