හිටපු පාකිස්තාන ක්රිකට් නායක ජාවෙඩ් මියැන්ඩාඩ්, වසර තුනකට ආසන්න කාලයක් බන්ධනාගාරගතව සිටින හිටපු පාකිස්තාන අග්රාමාත්ය සහ නායක ඉම්රාන් ඛාන් නිදහස් කරන ලෙස පාකිස්තාන රජයෙන් ප්රසිද්ධියේ ඉල්ලා තිබේ.
Narratives පොඩ්කාස්ට් වැඩසටහන සමඟ පසුගිය සතියේ සිදු කළ සංවේදී සම්මුඛ සාකච්ඡාවකදී මියැන්ඩාඩ් ඉම්රාන් ඛාන්ගේ වත්මන් තත්ත්වය පිළිබඳව දැඩි කනස්සල්ල පළ කළේය.
“ඔහු සමඟ සිදුවෙමින් පවතින දේ අවසන් වේවා කියා මම ප්රාර්ථනා කරනවා. ඔහුට මෙවැනි දෙයක් සිදුවීමට සුදුසු නැහැ. ඔහුට සිදුකරන දේ නිවැරදි දෙයක් නොවෙයි. එය අනවශ්ය දෙයක්,” යනුවෙන් මියැන්ඩාඩ් හැඟීම්බරව ප්රකාශ කළේය.
ඉම්රාන් ඛාන් සමඟ පැවැති සමීප සබඳතාව සිහිපත් කරමින් මියැන්ඩාඩ් සඳහන් කළේ, දෙදෙනා එක්ව පාකිස්තාන ක්රිකට් කණ්ඩායම 1980 සහ 1990 දශකවල නව උසකට රැගෙන ගිය බවයි.
එමෙන්ම ඉම්රාන් සහ තමන් අතර ක්රීඩා පිටියේදී දැඩි තරගකාරීත්වයක් හෝ ගැටුමක් පැවැති බවට ඇති අදහස්ද මියැන්ඩාඩ් ප්රතික්ෂේප කළේය.
“මම සහ ඉම්රාන් අතර කිසිම තරගකාරී සතුරුකමක් තිබුණේ නැහැ. අපි අතර ගැටුමක් තිබුණේ නැහැ. ඔහු මට කිසිම අයුරකින් වැරැද්දක් කළා කියලා මම කවදාවත් පැමිණිලි කරලා නැහැ. අපි එකට County ක්රිකට් පවා ක්රීඩා කළා. අපි එකට ඉතා හොඳ කාලයක් ගත කළා,” ඔහු පැවසීය.
ඉම්රාන් ඛාන්ගේ බන්ධනාගාරගත කිරීම සම්බන්ධයෙන් ප්රසිද්ධියේ අදහස් දැක්වූ පළමු ඉහළ පෙළේ පාකිස්තාන ක්රිකට් ක්රීඩකයා බවට මියැන්ඩාඩ් පත්වීම විශේෂත්වයකි.
මේ අතර, හිටපු ජාත්යන්තර නායකයන් 22 දෙනෙකු පසුගිය සතියේ පාකිස්තාන අග්රාමාත්ය ෂෙහ්බාස් ෂරීෆ් වෙත විවෘත ලිපියක් යොමු කරමින් ඉම්රාන් ඛාන්ට බන්ධනාගාරය තුළ ප්රමාණවත් වෛද්ය ප්රතිකාර ලබාදෙන ලෙසත්, ඔහුගේ පවුලේ සාමාජිකයන් හමුවීමට ඇති අයිතිය ඇතුළු අධිකරණ නියෝග ක්රියාත්මක කරන ලෙසත් ඉල්ලා තිබිණි.
ඔස්ට්රේලියානු නායක පැට් කමින්ස් ද එම හිටපු නායකයන්ගේ ඉල්ලීමට ප්රසිද්ධියේ සහාය පළ කර තිබේ.
මියැන්ඩාඩ් තවදුරටත් පාකිස්තාන රජයෙන් ඉල්ලා සිටියේ ඉම්රාන් සමඟ ඇති මතභේද අවසන් කර ඔහුව නිදහස් කරන ලෙසයි.
“ලෝකය පුරා ඉම්රාන්ට විශාල ගෞරවයක් තිබෙනවා. ඔහු පාකිස්තානය වෙනුවෙන් විශාල දෙයක් කරලා තියෙනවා. අපි ඒ ගැන සිතිය යුතුයි. අපි මේ මතභේද අවසන් කළ යුතුයි. ඔහු හිටපු අග්රාමාත්යවරයෙක්. ඔහුව නිදහස් කරන්න. එයින් ඔබට සිදුවන වෙනස කුමක්ද?” යනුවෙන් මියැන්ඩාඩ් පැවසීය.