தசுன் ஷனகாவுக்கு பிஎஸ்எல்-லிருந்து ஓராண்டுக்கு தடை விதிக்கப்பட்டது.

பாகிஸ்தான் கிரிக்கெட் வாரியம், இலங்கை டி20 அணியின் கேப்டன் தசுன் ஷனகாவை பாகிஸ்தான் சூப்பர் லீக் (பிஎஸ்எல்) தொடரில் இருந்து ஓராண்டுக்கு தடை செய்துள்ளது.

11வது பிஎஸ்எல் தொடரின் போது அவர் "தன்னிச்சையாக விலகியதால்" இந்த முடிவு எடுக்கப்பட்டதாக பிசிபி தெரிவித்துள்ளது.

லாகூர் கலந்தர்ஸ் அணியுடனான ஒப்பந்த நிலையை முழுமையாக ஆய்வு செய்த பின்னர், பிஎஸ்எல் தொடரில் ஷனகாவின் எதிர்காலப் பங்கேற்பு குறித்த தனது இறுதி முடிவை பிசிபி அறிவித்துள்ளது.

பிசிபியின் கூற்றுப்படி, மார்ச் 21, 2026 அன்று ஷனகா தொடரில் இருந்து தன்னிச்சையாக விலகியது, வீரர் பதிவு விதிகள் மற்றும் முத்தரப்பு ஒப்பந்தத்தை மீறிய செயலாகும். மேலும், இந்த விலகல் ஒப்பந்தத்தின் கட்டமைப்பிற்குள் ஏற்றுக்கொள்ளப்பட்ட காரணங்களுக்காக செய்யப்படவில்லை என்றும் அது கூறியுள்ளது.

ஷனகா வெளிப்படுத்திய வருத்தத்தையும், பாகிஸ்தானுக்காக விளையாட வேண்டும் என்ற அவரது விருப்பத்தையும் பிசிபி கருத்தில் கொண்டாலும், இந்த மீறலின் தீவிரத்தன்மை காரணமாக சட்ட நடவடிக்கை தேவை என்று பிசிபி கூறியுள்ளது.

அதன்படி, 2027 பிஎஸ்எல் தொடரில் ஷனகா பங்கேற்பதற்கு முழுமையாகத் தடை விதிக்கப்பட்டுள்ளது.

ஷனகா ஒரு அறிக்கையில் கூறியதாவது,

“பிஎஸ்எல் தொடரிலிருந்து விலகும் எனது முடிவிற்கு நான் மிகவும் வருந்துகிறேன். பாகிஸ்தான் மக்கள், பிஎஸ்எல் ரசிகர்கள் மற்றும் ஒட்டுமொத்த கிரிக்கெட் சமூகத்திடமும் எனது மனமார்ந்த மன்னிப்பைத் தெரிவித்துக் கொள்கிறேன்.

பிஎஸ்எல் ஒரு மதிப்புமிக்க தொடராகும். எனது செயல்களால் ஏற்பட்ட சிரமத்தை நான் முழுமையாகப் புரிந்துகொள்கிறேன். குறிப்பாக லாகூர் கலந்தர்ஸ் ரசிகர்களிடம் நான் மன்னிப்பு கேட்டுக்கொள்கிறேன்.

பிஎஸ்எல் தொடரிலிருந்து விலகிய நேரத்தில், வேறு எந்தத் தொடரிலும் சேரும் எண்ணம் எனக்கு இருக்கவில்லை. பாகிஸ்தான் ரசிகர்கள் மீது எனக்கு மிகுந்த மரியாதை உண்டு. எதிர்காலத்தில் பிஎஸ்எல் தொடருக்குத் திரும்புவதை ஆவலுடன் எதிர்பார்க்கிறேன்,” என்று அதில் கூறப்பட்டிருந்தது.

பிஎஸ்எல் தொடரின் நீண்டகால வெற்றிக்கு, தொழில்முறைத் தரங்களையும் வீரர்களின் ஒப்பந்தங்களில் உள்ள கடமைகளையும் நிலைநிறுத்துவது அவசியம் என்று பாகிஸ்தான் கிரிக்கெட் வாரியம் மேலும் வலியுறுத்தியது.