2026 කාන්තා ආසියානු කුසලාන තරගාවලියේ සිය ශූරතාව ආරක්ෂා කර ගැනීමේ ගමන විශිෂ්ට ලෙස ආරම්භ කළ ශ්රී ලංකා කාන්තා කණ්ඩායම, එක්සත් අරාබි එමීර් රාජ්යය කඩුලු 9කින් පරාජය කළේය.
ඩුබායිහි පැවැති තරගයේදී පළමුව පන්දුවට පහරදුන් UAE කණ්ඩායම පන්දුවාර 19.5කදී ලකුණු 79කට දැවී ගියේය.
ශ්රී ලංකාව වෙනුවෙන් විශිෂ්ට පන්දු යැවීමක නිරත වූ නවක මිතිලා අයෝධ්යා සහ සිය පළමු T20 ජාත්යන්තර තරගයට ක්රීඩා කළ චෙතනා විමුක්ති කඩුලු 3 බැගින් දවාගත්හ. අයෝධ්යා ලකුණු 14කටත්, විමුක්ති ලකුණු 16කටත් කඩුලු 3ක් ලබාගැනීම කැපී පෙනුණි.
ශ්රී ලංකා පන්දු යවන්නන්ගේ දැඩි පීඩනය හමුවේ UAE පිතිකාරිනියන්ට ඉනිම පුරාම ලකුණු රැස් කිරීම අපහසු වූ අතර, නායිකා Esha Oza ලකුණු 18ක් ලබාගනිමින් කණ්ඩායමේ වැඩිම ලකුණු ලාභිනිය විය.
ලකුණු 80ක පහසු ඉලක්කයක් හඹා ගිය ශ්රී ලංකාව පන්දුවාර 7.5කදී කඩුලු 1ක් පමණක් දැවී ජයග්රහණය සම්පූර්ණ කළේය.
නායිකා චමරි අතපත්තු පන්දු 25කින් නොදැවී ලකුණු 48ක් රැස් කරමින් සුපිරි පිතිහරඹයක නිරත වූවාය. ඇයගේ ඉනිමට හතරේ පහර කිහිපයක් සමඟ දැවැන්ත හයේ පහරක්ද ඇතුළත් විය.
මෙම හයේ පහරත් සමඟ චමරි කාන්තා ආසියානු කුසලාන තරගාවලියේ ලකුණු 500 සීමාව පසුකළ පළමු පිතිකාරිනිය බවට පත්වීමද විශේෂත්වයකි.
ඉමේෂි දුලානි ආරම්භයේදී වේගයෙන් ලකුණු රැස් කළද අවාසනාවන්ත ලෙස දුවද්දී දැවී ගියාය. ඉන් අනතුරුව චමරි කිසිදු අවදානමකට ඉඩ නොදී ශ්රී ලංකාව පහසු ජයග්රහණයක් කරා රැගෙන ගියාය.
මෙම ජයග්රහණයත් සමඟ 2024 වසරේ දිනාගත් සිය පළමු ආසියානු කුසලාන ශූරතාව ආරක්ෂා කර ගැනීමේ ශ්රී ලංකා මෙහෙයුම සාර්ථක ආරම්භයක් ලබා තිබේ.
