කාන්තා T20 ආසියානු කුසලාන තරගාවලියේ ආරම්භක තරගයෙන් හොංකොං කණ්ඩායම ලකුණු 6කින් පරාජය කිරීමට තායිලන්ත කණ්ඩායම සමත් විය.
ඩුබායිහිදී පැවැති තරගයේ පළමුව පන්දුවට පහරදුන් තායිලන්තය පන්දුවාර 20 අවසානයේ කඩුලු 9ක් දැවී ලකුණු 120ක් රැස් කළේය.
තායිලන්ත නායිකා Naruemol Chaiwai පන්දු 31කින් නොදැවී ලකුණු 43ක් ලබාගනිමින් ඉනිමේ වැඩිම ලකුණු ලාභිනිය වූවාය. ඇගේ ඉනිමට හතරේ පහර 4ක් සහ හයේ පහර 2ක් ඇතුළත් විය.
කෙසේ වෙතත්, තායිලන්ත ඉනිම අවසන් අදියරේදී වේගයෙන් කඩා වැටුණු අතර, අවසන් පන්දුවාර 3.1 තුළදී කඩුලු 7ක් ලකුණු 20කට දැවී ගියේය.
හොංකොං වෙනුවෙන් Marina Lamplough විශිෂ්ට පන්දු යැවීමක නිරත වෙමින් ලකුණු 11කට කඩුලු 4ක් දවාගත් අතර, පිතිකරණයෙන්ද පන්දු 11කදී ලකුණු 22ක් ලබා ගත්තාය.
ලකුණු 121ක ඉලක්කයක් හඹා ගිය හොංකොං කණ්ඩායමට පන්දුවාර 20 අවසානයේ කඩුලු 7ක් දැවී ලබාගත හැකි වූයේ ලකුණු 114ක් පමණි.
Kary Chan සහ Yasmin Daswani ලකුණු 28 බැගින් ලබාගනිමින් හොංකොං ඉනිමට වැඩිම දායකත්වයක් දැක්වූහ.
තායිලන්තයේ මැද පන්දුවාරවල විශිෂ්ට පන්දු යැවීම හේතුවෙන් තරගයේ පාලනය නැවත තමන් වෙත ලබාගැනීමට හැකි විය. දඟපන්දු යවන Onnicha Kamchomphu කඩුලු 3ක් දවාගනිමින් Chan, Daswani සහ හොංකොං නායිකා Maryam Bibiගේ කඩුලු ලබාගත්තාය.
අවසන් පන්දුවාර 3ට හොංකොංට ජයග්රහණය සඳහා ලකුණු 27ක් අවශ්යව තිබුණද, අවසන් පන්දු 18 තුළදී ඔවුන්ට ලබාගත හැකි වූයේ හතරේ පහර 2ක් පමණි.
අවසන් පන්දුවාරය යැවූ Thipatcha Putthawong ලකුණු 14ක් ආරක්ෂා කරමින් Shanzeen Shahzadගේ කඩුල්ල දවාගත් අතර, එම කඩුල්ලත් සමඟ කාන්තා T20 ජාත්යන්තර ක්රිකට් ඉතිහාසයේ වැඩිම කඩුලු ලාභීන් අතර පළමු ස්ථානයටද පත්විය.
ඒ අනුව ලකුණු 120ක් ආරක්ෂා කරගත් තායිලන්තය ලකුණු 6ක තියුණු ජයක් වාර්තා කරමින් කාන්තා T20 ආසියානු කුසලානයට ජයග්රාහී ආරම්භයක් ලබා ගත්තේය.
