ICC නවතම ශ්‍රේණිගත කිරීම්: ඉෂාන් කිෂන් හා ට්‍රැවිස් හෙඩ් ලොව අංක 1ට

ඉන්දීය කඩුලු රකින-පිතිකරු ඉෂාන් කිෂන් ICC නවතම T20 ජාත්‍යන්තර පිතිකරුවන්ගේ ශ්‍රේණිගත කිරීම්වල අංක 1 ස්ථානයට පත්ව තිබේ. ඔහු එම ස්ථානයේ සිටි තම ඉන්දීය කණ්ඩායම් සගයා අභිෂේක් ශර්මා අභිබවා මෙම ජයග්‍රහණය හිමිකරගෙන ඇත.

ඒ අනුව, විරාට් කෝලි, සූර්යකුමාර් යාදව් සහ අභිෂේක් ශර්මාට පසු ICC T20I පිතිකරු ශ්‍රේණිගත කිරීම්වල අංක 1 ස්ථානයට පත්වූ සිව්වැනි ඉන්දීය ක්‍රීඩකයා ලෙස ඉෂාන් කිෂන් ඉතිහාසයට එක්විය.

වසර දෙකකට අධික කාලයකට පසු මේ වසරේ ජනවාරි මාසයේදී ඉන්දීය T20 සංචිතයට නැවත කැඳවනු ලැබූ කිෂන්, නවසීලන්තයට එරෙහිව ලකුණු 76ක් සහ 103ක් රැස් කරමින් විශිෂ්ට දස්කම් දැක්වීය. එම දස්කම් හේතුවෙන් ඔහු ඉන්දීය T20 ලෝක කුසලාන සංචිතයටද ඇතුළත් වූ අතර, තරගාවලිය තුළ ලකුණු 317ක් රැස් කරමින් සිව්වැනි වැඩිම ලකුණුලාභියා බවට පත්විය. ඉන්දියාව 2024දී දිනාගත් T20 ලෝක ශූරතාව සාර්ථකව රැක ගැනීමටද ඔහු වැදගත් දායකත්වයක් ලබාදුන්නේය.

මේ අතර, T20I තුන් ඉරියව් ක්‍රීඩකයන්ගේ ශ්‍රේණිගත කිරීම්වල ශිවම් ඩුබේ ස්ථාන තුනක් ඉහළ ගොස් 7 වැනි ස්ථානයට පැමිණ තිබේ. අයර්ලන්තයට එරෙහි තරග දෙකේ තරගාවලිය ඉන්දියාව 2-0ක් ලෙස පරාජයට පත්වුවද, ඩුබේ ලකුණු 45ක් රැස් කළ අතර කඩුලු 3ක් ද දවා ගත්තේ 14.33ක සාමාන්‍යයක් සහ 7.16ක ආර්ථික වේගයක් සමඟිනි.

ටෙස්ට් ශ්‍රේණිගත කිරීම්

ටෙස්ට් පිතිකරුවන්ගේ ශ්‍රේණිගත කිරීම්වල ට්‍රැවිස් හෙඩ් අංක 1 ස්ථානයට පත්ව තිබේ. නවසීලන්තයට එරෙහි ටෙස්ට් තරග තුනේදී සාමාන්‍ය 28.50ක් සමඟ ලකුණු 171ක් පමණක් රැස් කළ ජෝ රූට්, ස්ථාන දෙකක් පහළ ගොස් 3 වැනි ස්ථානයට වැටී ඇත.

එංගලන්තයේ හැරී බෘක් දෙවැනි ස්ථානයේ පසුවන අතර, ඔහු සහ හෙඩ් අතර ඇත්තේ ශ්‍රේණිගත ලකුණු එකක පමණ වෙනසකි.

නවසීලන්තයේ ඩැරිල් මිචෙල්, ඩෙවෝන් කොන්වේ සහ ටොම් ලේතම් මෙන්ම එංගලන්තයේ බෙන් ඩකට් ද ටෙස්ට් පිතිකරුවන්ගේ ශ්‍රේණිගත කිරීම්වල ඉහළට පැමිණ ඇත. එසේම, ට්‍රෙන්ට් බ්‍රිජ් ටෙස්ට් තරගයේ දෙවැනි ඉනිමේ ලකුණු 94ක් රැස් කළ රචින් රවීන්ද්‍ර, ස්ථාන දෙකක් ඉහළ ගොස් 7 වැනි ස්ථානයට පැමිණ තිබේ.

ටෙස්ට් තුන් ඉරියව් ක්‍රීඩකයන් අතර ජාත්‍යන්තර ක්‍රිකට් දිවියෙන් සමුගත් බෙන් ස්ටෝක්ස් සිය අවසන් ශ්‍රේණිගත කිරීමේදී 3 වැනි ස්ථානයේ රැඳී සිටියි. ට්‍රෙන්ට් බ්‍රිජ් ටෙස්ට් තරගයේ කඩුලු 6ක්, එහි පළමු ඉනිමේ 4/70ක් දවා ගැනීමත් සමඟ ඔහු ස්ථාන දෙකක් ඉහළ ගියේය.

ටෙස්ට් පන්දු යවන්නන්ගේ ශ්‍රේණිගත කිරීම්වල, ආබාධයක් හේතුවෙන් අවසන් තරගයට ක්‍රීඩා නොකළ මැට් හෙන්රි දෙවැනි ස්ථානයට පහළ ගොස් ඇති අතර, ජස්ප්‍රිත් බුම්රා යළිත් අංක 1 පන්දු යවන්නා බවට පත්ව ඇත.

මෑතදී අවසන් වූ ටෙස්ට් තරගවල දස්කම් හේතුවෙන් බටහිර ඉන්දීය කොදෙව්වේ ශමර් ජෝසෆ් සහ කේමාර් රෝච් ශ්‍රේණිගත කිරීම්වල සැලකිය යුතු ඉහළ යාමක් වාර්තා කළ අතර, බංග්ලාදේශයට එරෙහිව සිම්බාබ්වේ කණ්ඩායමට ඉතිහාසයේ විශාලතම ටෙස්ට් ජයග්‍රහණය හිමිකර දීමට දායක වූ බ්ලෙසිං මුසාරබානි ද ටෙස්ට් පන්දු යවන්නන් අතර 19 වැනි ස්ථානය දක්වා ඉහළ ගොස් ඇත.