இலங்கை டெஸ்ட் அணித் தலைவர் பதவியிலிருந்து விலகிய தனஞ்சய டி சில்வா

இலங்கை டெஸ்ட் கிரிக்கெட் அணியின் தலைவர் பதவியிலிருந்து தனஞ்சய டி சில்வா விலகியுள்ளார். அடுத்த தலைமுறையினருக்கு தலைமைப் பொறுப்பை ஒப்படைக்க விரும்புவதாகத் தெரிவித்தே அவர் இந்த முடிவை எடுத்துள்ளார். எனினும், வீரராகத் தொடர்ந்து அணிக்காக விளையாடத் தயாராக இருப்பதாக அவர் தெரிவித்துள்ளார்.

இலங்கை அணியின் அடுத்த டெஸ்ட் தொடர், பாகிஸ்தானுக்கு எதிராக இரண்டு போட்டிகளைக் கொண்டதாக அமையவுள்ளது. இந்தத் தொடர் நவம்பர் 9ஆம் திகதி ராவல்பிண்டியில் ஆரம்பமாகவுள்ளது. தனஞ்சய டி சில்வாவுக்குப் பதிலாக புதிய டெஸ்ட் அணித் தலைவர் இதுவரை அறிவிக்கப்படவில்லை.

நடப்பு உலக டெஸ்ட் சம்பியன்ஷிப் சுழற்சியில் முதல் இரண்டு இடங்களுக்குள் இலங்கை அணி முன்னேறுவதற்கான வாய்ப்பு மிகவும் குறைந்துள்ள நிலையில், அடுத்த சுழற்சி ஆரம்பமாவதற்கு முன்னர் புதிய தலைமைத்துவம் அனுபவத்தைப் பெறுவதற்கு இந்த முடிவு வாய்ப்பளிக்கக்கூடும்.

தனஞ்சய டி சில்வா அணிக்கு வழங்கிய தலைமைத்துவத்துக்கு இலங்கை கிரிக்கெட் நிறுவனத்தின் பிரதம நிறைவேற்று அதிகாரி ஆஷ்லி டி சில்வா நன்றி தெரிவித்துள்ளார். அவரது கிரிக்கெட் வாழ்க்கையின் எஞ்சிய பகுதிக்கு வாழ்த்துகளையும் தெரிவித்துள்ளதுடன், வீரராக அவர் தொடர்ந்து அணிக்குக் கிடைப்பதையும் வரவேற்றுள்ளார்.

தனஞ்சய டி சில்வாவின் தலைமையில் இலங்கை அணி 18 டெஸ்ட் போட்டிகளில் விளையாடி ஏழு வெற்றிகளையும் எட்டு தோல்விகளையும் சந்தித்ததுடன், மூன்று போட்டிகளை வெற்றி தோல்வியின்றி நிறைவு செய்தது.

2024ஆம் ஆண்டு அவரது தலைமையின் கீழ் சிறந்த ஆண்டாக அமைந்தது. பங்களாதேஷுக்கு எதிரான டெஸ்ட் தொடரை 2-0 எனக் கைப்பற்றிய இலங்கை, இங்கிலாந்துக்கு எதிரான தொடரில் 2-1 எனத் தோல்வியடைந்த போதிலும், தி ஓவல் மைதானத்தில் நடைபெற்ற போட்டியில் வெற்றி பெற்றது. அதனைத் தொடர்ந்து நியூசிலாந்துக்கு எதிரான சொந்த மண்ணிலான தொடரையும் 2-0 எனக் கைப்பற்றியது.

எனினும், 2024ஆம் ஆண்டின் இறுதிப் பகுதியிலிருந்து 2025ஆம் ஆண்டின் ஆரம்பம் வரை தென்னாப்பிரிக்காவுக்கு எதிரான வெளிநாட்டுத் தொடரிலும், அவுஸ்திரேலியாவுக்கு எதிரான சொந்த மண்ணிலான தொடரிலும் இலங்கை அணி தொடர்ச்சியாக நான்கு தோல்விகளைச் சந்தித்தது.

தனஞ்சயவின் தலைமைத்துவக் காலத்தில் இலங்கை டெஸ்ட் கிரிக்கெட் எதிர்கொண்ட முக்கிய சவால்களில் ஒன்று குறைந்தளவிலான போட்டி அட்டவணையாகும். 2025 ஜூன் மாதத்தில் பங்களாதேஷுக்கு எதிரான சொந்த மண்ணிலான தொடரை 1-0 எனக் கைப்பற்றிய பின்னர், அடுத்த 12 மாதங்களுக்கு இலங்கை அணிக்கு டெஸ்ட் போட்டிகள் எதுவும் அட்டவணைப்படுத்தப்படவில்லை.

நடப்பு உலக டெஸ்ட் சம்பியன்ஷிப் சுழற்சியிலும் இலங்கை அணி 12 டெஸ்ட் போட்டிகளில் மட்டுமே விளையாடுகிறது. இது அணிகளுக்கு ஒதுக்கப்பட்டுள்ள குறைந்தபட்ச போட்டி எண்ணிக்கையாகும். குறிப்பாக டெஸ்ட் கிரிக்கெட்டில் மட்டும் கவனம் செலுத்தும் வீரர்களுக்கு இத்தகைய குறைந்த போட்டி அட்டவணை பெரும் சவாலாக இருப்பதாக தனஞ்சய முன்னர் பலமுறை சுட்டிக்காட்டியிருந்தார்.

இலங்கை ஆண்கள் அணியின் தலைமைத்துவம் மற்றும் நிர்வாகத்தில் இடம்பெற்று வரும் பரந்த மாற்றங்களுக்கு மத்தியில் தனஞ்சயவின் விலகலும் இடம்பெற்றுள்ளது. இந்த ஆண்டின் ஆரம்பத்தில், மட்டுப்படுத்தப்பட்ட ஓவர்கள் கொண்ட போட்டிகளுக்கான அணித் தலைவராக இருந்த சரித் அசலங்கவுக்குப் பதிலாக குசல் மெண்டிஸ் நியமிக்கப்பட்டார்.

புதிய டெஸ்ட் அணித் தலைவராக நியமிக்கப்படுவதற்கான பரிசீலனையில் குசல் மெண்டிஸும் இடம்பெறக்கூடும். எனினும், புதிய தலைவரைத் தேர்வாளர்கள் இதுவரை அறிவிக்கவில்லை.